Եկեղեցու պայքարն ընտանեկան բռնության դեմ և տղամարդկանց ներգրավումը կանխարգելման մեջ

ԵՀԽ հայաստանյան Կլոր սեղան բարեգործական հիմնադրամի (ՀԿՍ) նախաձեռնությամբ կայացավ «Եկեղեցու պայքարն ընտանեկան բռնության դեմ և տղամարդկանց ներգրավումը դրա կանխարգելման համար» ծրագրի շրջանակում նախատեսված դասընթացը Հայ Առաքելական Սուրբ Եկեղեցու Արագածոտնի, Արմավիրի, Շիրակի, Տավուշի, Գուգարաց, Գեղարքունյաց, Կոտայքի իրենց հոգևոր ծառայությունը մատուցող քահանաների և սոցիալական աշխատողների համար: Հաշվի առնելով Կորոնավիրուսի համավարակը՝ դասընթացը տեղի ունեցավ առցանց: Դասընթացավարն էր հոգեբան Դավիթ Գևորգյանը:

Օնլայն դասընթացն ուղղված էր սեռադերային կարծրատիպերի և նախապաշարումների, ինչպես նաև դրանցից բխող խտրական վարքի հոգեբանական առանձնահատկություններին։ Բացի այդ, շեշտադրվեցին նշված կարծրատիպերի կապը ընտանիքում բռնության հետ, ինչպես նաև դրանց հետ գործ ունենալու եղանակները։

Քահանաները փորձագետի հետ քննարկեցին նաև վերոնշյալ թեմայի վերաբերյալ իրենց հովվության ներքո գտնվող համայնքներում առաջացած օրակարգային խնդիրները` ստանալով մասնագիտական խորհրդատվություն և ուղղորդում:

Արդեն մեկ տասնամյակ ԵՀԽ հայաստանյան Կլոր սեղան բարեգործական հիմնադրամը ՄԱԿ-ի Բնակչության հիմնադրամի հետ համագործակցությամբ իրականացնում է Հայաստանում ընտանեկան բռնությունների կանխարգելմանն ուղղված ծրագրեր: Դրանց շրջանակում շարունակական վերապատրաստումներ են անցկացվում Հայ Առաքելական Եկեղեցու հոգևորականների և աշխարհիկ սոցիալական աշխատակիցների համար, որպեսզի նրանք իրականացնեն ընտանիքում բռնության առաջնային կանխարգելում` բարձրացնելով մարդկանց իրազեկությունը համայնքներում և ՀՀ բանակում, ինչպես նաև տրամադրելով անհատական, զույգի և ընտանեկան խորհրդատվություն:

Իրենց ուրույն տեղն է զբաղեցնում հատկապես նորապսակների կամ ամուսնության պատրաստվող երիտասարդ զույգերի հետ տարվող խորհրդատվությունը: Ընտանիքում բռնությունն ունի բարդ ու բազմակողմանի բնույթ, որը պահանջում է համակողմանի մոտեցում: Այդ նպատակով Եկեղեցին և ՀԿՍ-ն ներկայացված են միջոլորտային աշխատանքային խմբերում` ուղղված բազմամասնագիտական գործնական մեխանիզմների մշակմանը: Տղամարդկանց ներգրավումը ծրագրի շրջանակում իրականացվելիք գործողություններին` հենց այն գլխավոր բանալին է, որն անհրաժեշտ է ընտանեկան բռնությունները կանխարգելելու համար:

{gallery}Images/2020/06_June/Church_and_Men_against_domestic_Violence{/gallery}