«Իրազեկվածության բարձրացում ընտանեկան բարեկեցությանն ուղղված քայլեր» ծրագիրը՝ «Սուրբ Նշան» կենտրոնում

Երեխաների և ծնողների անմիջական մասնակցությամբ, խաղային և ուսուցողական ձևաչափերով հարուստ միջոցառումն ապահովեց Արմավիրի Մարզի Արաքս խոշորացված համայնքի «Սուրբ Նշան» սոցիալական, կրթամշակութային կենտրոնի օրվա ուրախ և ջերմ մթնոլորտը։

Կենտրոնի ղեկավար Հասմիկ Մխիթարյանը և համայնքի հոգևոր սպասավոր Արժանապատիվ Տ․ Գևորգ քահանա Կրտիկաշյանը ԵՀԽ հայաստանյան Կլոր սեղան հիմնադրամի «Իրազեկվածության բարձրացում ընտանեկան բարեկեցությանն ուղղված քայլեր» ծրագրի շրջանակում կազմակերպել էին «Երեխաների պաշտպանություն և իրավունքներ» թեմայով միջոցառում-քննարկում, որտեղ իրենց անմիջական մասնակցությունն ունեցան Գայ համայնքի մի շարք ընտանիքներ: 

Քննարկման նպատակն էր բարձրացնել ծնողների և երեխաների տեղեկացվածությունը երեխաների իրավունքների, ինչպես նաև դրանց պաշտպանման մեխանիզմների վերաբերյալ։ 

Քննարկման հիմնական թեմաներն էին՝ «Երեխաների իրավունքների միջազգային և ազգային օրենսդրական հիմքերը», «Ինչպես ճանաչել իրավունքների խախտումը և համապատասխան քայլեր ձեռնարկել», «Ծնողների և երեխաների պարտականություններն ու փոխադարձ հարգանքի կարևորությունը»։ 

Հանդիպման արդյունքում ծնողները շնորհակալություն հայտնեցին իրենց դերի և պարտականությունների վերանայման, հստակեցման համար՝ խորապես գիտակցելով այդ ամենի կարևորությունը, իսկ երեխաները նշեցին, որ էլ ավելի լավ հասկացան իրենց իրավունքներն ու, անհրաժեշտության դեպքում, այլևս հիմնավորված կերպով դրանք կպաշտպանեն։

Հանդիպումն անցավ խաղային և խմբային քննարկումներով լի ոգեշնչող ջերմ մթնոլորտում։

Միջոցառումն իրականացվեց՝ Եվրոպական միության կողմից ֆինանսավորվող և ՄԱԿ-ի Կանանց հարցերով կազմակերպության ու ՄԱԿ-ի Բնակչության հիմնադրամի կողմից իրականացվող «ԵՄ-ն հանուն կանանց և տղամարդկանց իրավահավասարության. միասին ընդդեմ գենդերային կարծրատիպերի և բռնության» ծրագրի երկրորդ փուլի շրջանակներում` Եկեղեցիների Համաշխարհային Խորհրդի հայաստանյան Կլոր սեղան հիմնադրամի հետ համագործակցությամբ։ 

Բովանդակության համար պատասխանատվություն է կրում Եկեղեցիների Համաշխարհային Խորհրդի հայաստանյան Կլոր սեղան հիմնադրամը և պարտադիր չէ, որ այն արտահայտի Եվրոպական միության, ՄԱԿ-ի Կանանց հարցերով կազմակերպության կամ ՄԱԿ-ի Բնակչության հիմնադրամի տեսակետները։