«Քաղաքացիական կրթությունը Շիրակի մարզում» ծրագրի նոր փուլը

ԵՀԽ հայաստանյան Կլոր սեղան հիմնադրամը մեկնարկեց «Քաղաքացիական կրթությունը Շիրակի մարզում» ծրագրի 2024 թ.-ի նոր փուլը՝ ի նպաստ երիտասարդական նախաձեռնությունների և համայնքային կյանքում երիտասարդների ներգրավվածության խթանման: 

Այդ կապակցությամբ, աջակցությամբ Գյումրու «Խաչմերուկ» սոցիալ-կրթական խորհրդատվական կենտրոն հիմնադրամի ղեկավար կազմի, մասնակցությամբ Գյումրու և Շիրակի մարզի տարբեր համայնքների երիտասարդների, նշյալ կենտրոնում իրականացվեց համակարգող հանդիպում՝ ՀԿՍ ներկայացուցչի կողմից ծրագրի ներկայացման և երիտասարդներին հուզող հարցերի հստակեցման նպատակով։

Երիտասարդներն իրազեկվեցին, որ կազմակերպվելու են մի շարք դասընթացներ և հանդիպումներ ծրագրային աշխատանքի կարողությունների զարգացմանն ուղղված համապատասխան թեմաներով, որից հետո իրենք հնարավորություն կունենան ներկայանալու համայնքային խնդիրների վերաբերյալ իրենց պատրաստած իրազեկման և լուծման ծրագիր-առաջարկներով, որոնցից լավագույնները կընտրվեն՝ ՀԿՍ-ի աջակցությամբ իրագործելու նպատակով:

Կատարվեց նաև կարիքի գնահատում: Երիտասարդները բարձրաձայնեցին իրենց հուզող խնդիրների մասին, որոնց կարգավորման շուրջ կցանկանային աշխատանք իրականացնել:

Այնուհետև հիմնադրամի ներկայացուցիչը թեմի երիտասարդաց միության պատասխանատու Գոհար Գալտագազյանի հետ այցելեց Ազատան համայնք, որտեղ հանդիպեց նշյալ ծրագրի 2023 թ.-ի փուլի 2 թիմի բաժանված երիտասարդներին. առաջին թիմն այդ պահին մասնակցում էր համակարգչային բազային գիտելիքների դասընթացին, իսկ երկրորդը` կարի ուսուցման դասընթացին:

Ծրագիրն իրականացվում է ԵՀԽ ՀԿՍ եռամյա գործողությունների ծրագրի շրջանակում՝ «Հաց աշխարհի համար» (Brot für die Welt) կազմակերպության հետ համագործակցությամբ: