ԵՀԽ պատվիրակության այցը ԵՀԽ հայաստանյան Կլոր սեղան հիմնադրամ

Սեպտեմբերի 21-ին Եկեղեցիների Համաշխարհային Խորհրդի (ԵՀԽ) գլխավոր քարտուղար, Վերապատվելի Դր․ Ջերրի Փիլեյի գլխավորած պատվիրակությունը՝ ԵՀԽ Կենտրոնական հանձնախմբի փոխատենապետ Գերաշնորհ Տ․ Վիգեն Արքեպիսկոպոս Այքազյանի և Մայր Աթոռ Սուրբ Էջմիածնի Միջեկեղեցական հարաբերությունների բաժնի տնօրեն, Գևորգյան հոգևոր ճեմարանի տեսուչ Հոգեշնորհ Տ. Շահե Ծայրագույն Վարդապետ Անանյանի ուղեկցությամբ, այցելեց ԵՀԽ Հայաստանյան Կլոր սեղան հիմնադրամ (ՀԿՍ)։

Հանդիպմանը ներկա էին ԵՀԽ Եկեղեցիների միջազգային հարաբերությունների հանձնաժողովի տնօրեն Փիթեր Փրովը, ԵՀԽ «Հավատք և կարգ» ծրագրի ղեկավար Անի Ղազարյան-Դրիսին, ԵՀԽ Մերձավոր Արևելքի ծրագրի ղեկավար Կառլա Խիջոյանը, ԵՀԽ կենտրոնական կոմիտեի անդամ, ԵՊՀ Աստվածաբանության ֆակուլտետի պրոֆեսոր Դիանա Ծաղիկյանը և ԵՀԽ ՀԿՍ աշխատակիցներ:

Հանդիպման ընթացքում ԵՀԽ ՀԿՍ տնօրեն Կարեն Նազարյանը և ծրագրերի ղեկավար Ծովինար Ղազարյանը ներկայացրեցին հիմնադրամի գործունեությունը։

Անդրադարձ կատարվեց Ադրբեջանի կողմից սանձազերծված պատերազմի հետևանքով տուժած ընտանիքների աջակցությանը նվիրված՝ 2020-2022 թթ. Ծրագրերին: Քննարկվեցին 2023 թ. տարածաշրջանում առկա մարտահրավերներ, Ադրբեջանի կողմից Հայաստանի ու Արցախի նկատմամբ շարունակվող ոտնձգությունները, Արցախում ստեղված հումանիտար աղետը և նշյալ ծրագրերի շարունակականության անհրաժեշտությունը:

ՀԿՍ ներկայացուցիչներն իրենց շնորհակալությունը հայտնեցին ԵՀԽ պատվիրակությանը Հայաստանին ցուցաբերած աջակցության և արցախյան խնդրի խաղաղ կարգավորման հարցում իրենց նպաստը բերելու պատրաստակամության համար:

Կարևորվեց համերաշխության, խաղաղության հաստատումը, դատապարտվեց ցեղասպանությունը: