Կլոր սեղան հիմնադրամի մարդասիրական օգնության ծրագրում ընդգրկվել են նաև Արցախից ժամանած ընտանիքներ

«Արձագանքում COVID-19-ին» ծրագրի շրջանակում ԵՀԽ հայաստանյան Կլոր սեղան հիմնադրամի (ՀԿՍ) աշխատակիցներն այցելել են Հայ Առաքելական Եկեղեցու Շիրակի թեմի՝ Գյումրիի սոցիալական կենտրոն՝ մարդասիրական օգնություն բաշխելու գործընթացը վերահսկելու նպատակով։

Ծրագրի նպատակն է ապահովել մարդասիրական օգնության հասանելիությունը, հատկապես համավարակին ենթակա խոցելի խմբերի համար՝ ավելի բարձր սոցիալական համախմբածության և կենսապահովման բարելավման միջոցով: Այդ հարցում ՀԿՍ-ն համագործակցում է Հայ եկեղեցու և տեղական կառավարման մարմինների հետ: Նախատեսվում է նաև Արցախից ինքնաբուխ ժամանած 171 մարդու տրամադրել սննդի և տնտեսական ապրանքների փաթեթներ։

Սկզբնական փուլում նախատեսված է եղել աջակցություն տրամադրել 600 շահառուի, բայց որոշ ապրանքներ ավելի մատչելի գնելու արդյունքում կուտակված գումարով գնվելու է ևս 70 փաթեթ սնունդ և 204 փաթեթ տնտեսական ապրանք։

Կենտրոնում օգնության բաշխումը իրականացվում է կորոնավիրուսի կանխարգելման բոլոր պայմանների պահպանմամբ՝ գծանշումներ, դիմակների բաշխում, ձեռքերի ախտահանում, ջերմաչափում, սոցիալական հեռավորություն։

Սոցաշխատողների խոսքով գրանցված արցախցիների մեծ մասն արդեն վերադարձել է հետ։ Շիրակի մարզպետարանի հետ ցուցակները կթարմացվեն։

Ընտանիքներից մեկը 25 տարի առաջ Գյումրիից գնացել է Քարվաճառ՝ բնակություն հաստատելու: 25 տարի շարունակ դժվարությամբ տուն են ստեղծել ու մի քանի օր առաջ այրել են ունեցվածքը՝ թշնամուն չթողնելու համար: Շահառուներից մի կին հուզված պատմել է, որ ադրբեջանցիների տեսանյութերից մեկում տեսել էր իր Բերձորի տունը։ Այս ընտանիքները վերադառնալու մասին բացարձակապես չեն մտածում, քանի որ անվտանգության երաշխիք չունեն։

{gallery}Images/2020/11_November/COVID_19-Artsakh{/gallery}