Կայուն եկամտի և սոցիալական խնդիրները լուծելու հնարավորություն՝ Արցախից տեղահանված ևս երեք ընտանիքի

ԵՀԽ հայաստանյան միջեկեղեցական բարեգործական Կլոր սեղան հիմնադրամը, հավատարիմ մնալով իր սկզբունքներին, պատերազմի առաջին իսկ օրվանից տարաբնույթ աջակցության ծրագրեր է իրականացնում ի նպաստ Արցախից տեղահանված ընտանիքների։

Այս պահին ԵՀԽ հայաստանյան Կլոր սեղան հիմնադրամը «Ավրորա մարդասիրական նախաձեռնություն» հիմնադրամի օժանդակությամբ իրականացնում է «Արցախցի ընտանիքներին Հայաստանում աշխատանքով ապահովում» մարդասիրական ծրագիրը։ Ծրագրի նպատակն է թեթևացնել Արցախից տեղահանված ու խոցելի ընտանիքների ֆինանսական բեռը և լուծել զբաղվածության հարցը։

Օրերս ծրագրի շրջանակներում ՀԿՍ աշխատակիցները Արմավիրի մարզի Այգեվան համայնքում բնակություն հաստատած Արցախից տեղահանված երեք ընտանիքի նվիրաբերեցին 44-ական հավ, 6-ական աքլոր և կեր՝ 6 ամսվա համար։

Անչափ հուզիչ էր տեսնել այս մարդկանց դեմքին ժպիտ և ուրախություն իրենց կյանքի այս դժվարին փուլում։ Նախաձեռնությունը շարունակական է լինելու, և շուտով նոր ընտանիքներ նույնպես հնարավորություն կունենան թոթափելու պատերազմի ծանր բեռը և վերսկսելու իրենց կյանքը՝ ապահովելով կայուն եկամուտ: