«Պատասխանատու հայրություն» թեմայով քննարկում-միջոցառում Գյուլագարակում

ԵՀԽ հայաստանյան Կլոր սեղան հիմնադրամի և ՄԱԿ-ի Բնակչության հիմնադրամի Հայաստանյան գրասենյակի համագործակցությամբ իրականացվող «Ընտանեկան բռնության վերաբերյալ Հայ Եկեղեցու կողմից իրականացվող աշխատանքներն իրազեկման, արձագանքման և կանխարգելման հարթակում» ծրագրի շրջանակում, տղամարդկանց միջազգային տոնի կապակցությամբ` նոյեմբերի 29-ին կայացավ «Պատասխանատու հայրություն» թեմային նվիրված միջոցառում: Այն կազմակերպել էր Գուգարաց թեմի հոգևոր սպասավոր Տ. Մերուժան քահանա Սողոյանը: Հանդիպումը կայացավ ՀԱԵ Գուգարաց թեմում՝ Լոռու մարզի Գյուլագարակ համայնքի միջնակարգ դպրոցում:

Միջոցառմանը ներկա էին դպրոցի տնօրեն Լուսինե Մատինյանը, Գուգարաց թեմի սոցիալական բաժնի պատասխանատու Հռիփսիմե Միրզոյանը և ծրագրերի համակարգող Արևիկ Եղիազարյանը:

Միջոցառման մասնակիցներն էին դպրոցի աշակերտները և նրանց ծնողները: Միջոցառումը բաղկացած էր 4 հիմնական ուղղություններից. 1) բանաստեղծություններ, երգեր և հայտնիների խոսքեր` ուղղված հայրերին ու «Հայրս և ես» թեմային, 2) ներկայացում «Հայրը և որդիները» թեմայի մասին` «Անառակ որդու վերադարձը» առակի սցենարով, 3) «Պատասխանատու Հայրը», «Հայրն ու զավակները», «Հայրիկի դերն ընտանիքում» խորագրերով շարադրությունների ընթերցում և նվերների հանձնում, 4) բանախոսություն Տեր Մերուժանի կողմից «Պատասխանատու հայրություն» թեմայի վերաբերյալ:

Միջոցառումից առաջ քահանան հանձնարարել էր երեխաներին գրել վերոնշյալ թեմաներով շարադրություններ, որոնցից լավագույններն ընթերցեց միջոցառման ընթացքում, իսկ հեղինակներին նվիրեց Աստվածաշունչ և աղոթագրքեր:

Քահանան իր խոսքում կարևորեց ընտանեկան բռնության կանխարգելումն ու շեշտադրեց, որ հայրերի պատասխանատվության շնորհիվ է հատկապես հնարավոր ընտանիքում խաղաղության հարատևումն ու երեխաներին սիրո մթնոլորտում դաստիարակելը և ճիշտ ուղղու վրա կանգնեցնելը, ինչն էլ դառնում է Աստվածահաճո ընտանիքի կառուցման հիմնաքարը:

«Պատասխանատու Հայրն է ընտանեկան բռնության կանխարգելման գլխավոր բանալին» արտահայտությունը դարձավ միջոցառման կարգախոսն ու ծնողների ուղեցույցը:

{gallery}Images/2021/12_December{/gallery}