Նորություններ

ՀԱԵ Արագածոտնի թեմի Աշտարակի «Սուրբ Մարիանե» սոցիալական կենտրոնի և Սաղմոսավանի Հայորդաց տան սաների մասնակցությամբ Սաղմոսավանի նորակառույց Հայորդաց տան դահլիճում ցուցադրվեց բնապահպանական բովանդակությամբ «Բացատում» թատերական ներկայացումը: «Սուրբ Մարիանե», ինչպես նաև Սաղմոսավանի սոցիալական կենտրոնները գործում են ԵՀԽ հայաստանյան Կլոր սեղան հիմնադրամի աջակցությամբ:

DSC09196

Միջոցառման նպատակն է արվեստի միջոցով իրազեկել մարդկանց` շրջակա միջավայրի պահպանմանը վերաբերող հիմնախնդիրներին, ինչպես նաև նպաստել երկու կենտրոնի սաների համագործակցության, ընկերական հարաբերությունների զարգացմանն ու ամրապնդմանը, այդ թվում` փոխանցել «Սուրբ Մարիանե» կենտրոնի փորձը Հայորդաց տան սաներին:

Ներկայացման նախաձեռնողը «Սուրբ Մարիանե» սոցիալական կենտրոնի թատերական խմբակն էր, որտեղ մշակվել է սցենարը, պատրաստվել են զգեստները և բեմադրության համար անհրաժեշտ պարագաները, իրականացվել են փորձերը: «Սուրբ Մարիանե» կենտրոնը նշված աշխատանքներին հրավիրել է մասնակցել նաև Սաղմոսավանի Հայորդած տան սաներին, որոնք ակտիվորեն և մեծ ոգևորությամբ հաճախում էին փորձերին:

20191107 172757

Ներկայացմանը հաջորդած համերգային ծրագրի ընթացքում կենտրոնների երեխաները կատարեցին ազգային երգեր՝ սկզբում երկու կենտրոնի միասնական երգչախմբով, իսկ հետո ամեն կենտրոնի երգչախումբն առանձին: Բեմադրությանը ներկա են եղել «Սուրբ Մարիանե» սոցիալական կենտրոնի աշխատակազմը, Հայորդաց տան սաներն Սաղմոսավան և Արտաշավան գյուղերից, նրանց ընտանիքների անդամները, հարազատները:

DSC09167

Հանդիսատեսները ծանոթացան նաև Հայորդաց տան սաների բազմաթիվ նկարչական ստեղծագործություններին, որոնք ստեղծվել են «Սուրբ Մարիանե» սոցիալական կենտրոնի կամավորների կազմակերպած նկարչության դասընթացների ժամանակ: Նախատեսվում է համատեղ միջոցառումների իրականացումը դարձնել շարունակական, ինչը կնպաստի նաև Սաղմոսավանում և Արտաշավանում համայնքային կյանքի աշխուժացմանը:

Արագածոտնի թեմի «Սուրբ Մարիանե» սոցիալական կենտրոնը World Vision Armenia կազմակերպության հետ համագործակցությամբ երեխաների և մեծահասակների համար կազմակերպեց հերթական ուխտագնացություն` դեպի Գյումրի: Ուխտագնացությանը մասնակցեց կենտրոնի 52 անդամ:


Ուխտագնացությունը մեկնարկեց Գյումրու Յոթ Վերք եկեղեցով, որտեղ տեղի քահանան ներկայացրեց եկեղեցու պատմությունը, խոսեց սրբավայրի մասին, աղոթեց ուխտավորների հետ:


Ուխտավորները շրջեցին նաև Գյումրու հրապարակով և Սուրբ Ամենափրկիչ եկեղեցու տարածքով, որը մեծ ավերածության էր ենթարկվել Սպիտակի երկրաշարժի ժամանակ, իսկ այժմ դեռ շարունակվում է վերակառուցումը: Այնուհետև ուխտավորներն ուղևորվեցին դեպի Հառիճավանք, որտեղ Թրբանճյան ընծայարանի սաները նրանց ծանոթացրեցին Հառիճավանքի պատմությանը, ցուցադրեցին համալիրի տարածքում գտնվող եկեղեցիները, մատուռները, ներկայացրեցին դրանց հետ կապված պատմությունները: Կենտրոնի տղա երեխաներից մի քանիսը նույնիսկ ցանկություն հայտնեցին հիմնական դպրոցն ավարտելուց հետո ուսանել Հառիճավանքի ընծայարանում։

«Քաջ Նազարը Արարատի լանջին»

 

Արագածոտնի թեմի Սաղմոսավանի նորակառույց Հայորդաց տանը իրականացվող դասընթացների շարքում ամենասիրվածներից են նկարչության դասերը: Ակտիվորեն մասնակցում է շուրջ 60 երեխա` Սաղմոսավան և Արտաշավան գյուղերից:

nkarich
Նրանցից է 8-րդ դասարանցի Ռուբիկ Քոչարյանը, որը ցուցաբերելում է մեծ հետաքրքրություն և առաջադիմություն: Հունիսի 2-ին Ռուբիկը մասնակցեց «Մինորա» մշակութային կենտրոնի կազմակերպած «Էտյուդ» մրցույթ-փառատոնին, որը նվիրված էր Հովհաննես Թումանյանի 150-ամյակին։ Մրցույթին ՀՀ մարզերից և քաղաքներից մասնակցում էր տարբեր տարիքի 172 երեխա: Մրցույթի արդյունքներով Ռուբիկն իր «Քաջ Նազարը Արարատի լանջին» նկարով զբաղեցրեց 2-րդ պատվավոր տեղը և արժանացավ պատվոգրի: Պատվոգրի արժանացավ նաև նրա ուսուցիչ, մանկավարժ Սաթենիկ Հովսեփյանը:


ԵՀԽ հայաստանյան Կլոր սեղան հիմնադրամի աջակցությամբ գործող Սաղմոսավանի Հայորդյաց տան գործունեությունը կազմակերպվում է Արագածոտնի թեմի «Սուրբ Մարիանե» սոցիալական կենտրոնի և տեղի դպրոցի մասնագետների կողմից` կամավոր հիմունքներով: Այստեղ դասավանդվում են նկարչություն, թափոններից կենցաղային իրերի և հուշանվերների պատրաստման հմտություններ, երգեցողություն, կազմակերպվում են կրթատեղեկատվական դասընթացներ` բնապահպանական թեմաներով: Իրականացվում են նաև համակարգչային հմտությունների ուսուցման դասընթացներ` բարձր որակավորման մասնագետների կողմից, որոնց նախապատրաստումն իրականացվել է Կլոր սեղան հիմնադրամի կազմակերպած դասընթացների միջոցով:

ՄԻՌ հեռուստաընկերության անդրադարձը Աշտարակում՝ Հայ Առաքելական Եկեղեցու Արագածոտնի թեմին կից, ԵՀԽ հայաստանյան Կլոր սեղան հիմնադրամի աջակցությամբ գործող «Սուրբ Մարիանե» սոցիալական կենտրոնի մասին:

Արագածոտնի մարզի Սաղմոսավան համայնքում գործող սոցիալական կենտրոնի ավարտվեց համակարգչային գիտելիքի ուսուցիչների վերապատրաստման դասընթացը: Այն կազմակերպվել էր Կլոր սեղան հիմնադրամի աջակցությամբ: Դասընթացի ավարտից առաջ վերապատրաստող դասընթացավար Լիլիա Թոթոլյանն անցկացրել է ավարտական թեստավորում՝ մասնակիցների ստացած գիտելիքը ստուգելու նպատակով:

Վերապատարաստման դասընթացի ավարտին բոլոր մասնակիցները ստացան վկայականներ: Սաղմոսավանի կենտրոնի Քրիստոֆ Արմեն Քեբաբջյան սրահում վկայականները հանձնեց Կլոր սեղան հիմնադրամի գործադիր տնօրեն Կարեն Նազարյանը: Նա միջոցառմանը մասնակցող դպրոցականներին և նրանց ծնողներին ասաց, որ կենտրոնը հիմնվել է հենց նրանց կարիքները հոգալու համար: «Մենք ցանկանում ենք, որպեսզի դուք ասեք, թե ինչի կարիք ունեք և ինչ ծրագրեր են անհրաժեշտ ձեզ համար: Այս կենտրոնը հիանալի հնարավորություններ ունի բազմատեսակ նախաձեռնություններ իրականացնելու համար»,- շեշտեց Նազարյանը: Համակարգչային գիտելիքների վերապատրաստման կրթական ծրագիրը մեկնարկել է 2018 թ. հոկտեմբերին:

Վերապատրաստմանը մասնացկել է Սաղմոսավան և հարակից համայնքների 4 կին ուսուցիչ: Նրանք այսուհետև Սաղմոսավանի սոցիալական կենտրոնի շահառուներին, ինչպես նաև իրենց համայնքների դպրոցների աշակերտներին կսովերցնեն համակարգչային անհրաժեշտ գիտելիքներ:

Կենտրոնի հյուրերից Աշտարակի Սբ. Մարիանե սոցիալական կենտրոնի ղեկավար Կարինե Գրիգորյանն ասաց, որ շուտով իրենց կենտրոնը դասընթացների շարք կսկսի Սաղմոսավանում:

Միջոցառման ավարտին Սբ. Մարիանե սոցիալական կենտրոնի սաները ներկայացրեցին մի քանի երգ՝ կենդանի կատարմամբ:

Սաղմոսավանի սոցիալական կենտրոնը հիմնվել է 2018 թ. հունիսին՝ Կլոր սեղան հիմնադրամի և Քեբաբջյան ընտանիքի սերտ համագործակցությամբ: Այն Հայաստանի տարածքում գործող 11 նմանատիպ կառույցներից մեկն է: Սոցիալական կենտրոնները գործում են Հայ Առաքելական Եկեղեցու թեմերի հովանու ներքո և Կլոր սեղան հիմնադրամի աջակցությամբ: Սոցիալական կենտրոններում պարբերաբար կազմակերպվում են դասընթացներ, արհեստների ուսուցում, քննարկումներ, տրամադրվում է սոցիալ-հոգեբանական աջակցություն՝ համայնքի խոցելի խավերի համար:

 

 

 

 

 

 

Արագածոտնի թեմի Աշտարակի «Սուրբ Մարիանե» սոցիալական կենտրոնի 14 երիտասարդներ Սաղմոսավանքի սոցիալական կենտրոնում հանդես եկան «Թափոնները մեր կյանքում» թատերական ներկայացումով։ Ներկայացումը կրում էր ինտերակտիվ-ուսուցողական բնույթ: Հանդիսատեսը, որոնց մեջ էին Սաղամոսավանի բնակիչները և ուխտավորները, ակտիվորեն ներգրավեցին գործողությունների մեջ։ Ներկայացման ընթացքում ներկաները ստացան գիտելիքներ թափոնների, դրանց տեսակների, բացասական ազդեցությունների և քայքայման ժամկետների մասին։ 


Թեմայի արդիականությունը, կենդանիների և թափոնների վառ ու գունավոր կերպարները, Կենտրոնում տարբեր թափոններից պատրաստված ծառերը, իրենց բնական տեսքով ստեղծում էին անտառային տրամադրություն՝ այն, ինչի շուրջ ծավալվում էին ներկայացման գործողությունները։
Ներկայացման ավարտին երեխաները հանդիսատեսին ցուցադրեցին այն իրերը, որոնք կարելի է պատրաստել թափոններից և որոշ չափով լուծել բնության աղտոտվածության խնդիրը՝ թղթից պատրաստված զարդեր, պոլիէթիլենային տոպրակներից զարդատուփեր, պայուսակներ, պլաստիկից և ապակե շշերից պատրաստած կենցաղային իրեր և այլն: 

Ներկաներից ոմանք շնորհակալական խոսք հայտնեցին՝ նշելով, որ թերևս շատ ներկայացումներ են դիտել, բայց այս մեկը լավագույնն էր իրենց ամբողջ կյանքում: Ներկայացման ավարտից հետո երեխաներն ուղևորվեցին Սաղմոսավանք, որտեղ մասնակցեցին ժամերգության: Ավարտին երեխաների մի մասը, ավանդույթի համաձայն, սկսեց նկարել եկեղեցին իսկ մյուսները կազմակերպեցին ակտիվ հանգիստ՝ ներգարվվելով տարբեր խաղերի մեջ:

ԱԻՆ ներկայացուցիչները ԵՀԽ հայաստանյան Կլոր սեղան հիմնադրամի աջակցությամբ գործող Արագածոտնի թեմի Աշտարակ քաղաքի «Սուրբ Մարիանե» սոցիալական կենտրոնում իրականացրեցին հերթական հանդիպում-դասընթացը, որը նվիրված էր հրդեհների ժամանակ իրականացվելիք անհրաժեշտ գործողություններին։ Արագածոտնի մարզի Փրկարարական վարչության աշխատակիցներ` պարամեդիկ ենթասպա Նվարդ Օհանյանը և կապիտան Հրանտ Մուրադյանը «Սուրբ Մարիանե» սոցիալական կենտրոնում իրականացրեցին դասընթաց, նվիրված արտակարգ իրավիճակների ժամանակ իրականացվող գործողություններին և տուժածներին տրամադրվող առաջին օգնության ձևերը:


Պատրաստված էր սցենար, որը ենթադրում էր Կենտրոնում ստեղծել արտակարգ իրավիճակ և արդյունքում առաջացնել տարհանման անհրաժեշտություն։ Եվ այդ ընթացքում, առաջացած խուճապի հետևանքով, ունենալ երկու տուժած երեխա։

Հատկապես վերջին ժամանակներում բավականին հաճախ են արտակարգ իրավիճակներն աշխարհի տարբեր երկրներում, բացառություն չի կազմում նաև մեր հանրապետությունը: Յուրաքանչյուր սխալ գործողություն կարող է ունենալ անդառնալի հետևանքներ:

«Սուրբ Մարիանե» սոցիալական կենտրոնին UMCOR Armenia հիմնադրամի կողմից տրամադրվել են կրակմարիչներ, և առաջին օգնության համար օգտագործվող դեղորայք, տոնոմետր և այլ առաջնային անհրաժեշտության պարագաներ:

Դասընթացավարները ներկայացրեցին տուժածներին որպես առաջին օգնություն ցուցաբերելու համար գործողությունները: «Տուժածներին» վիրակապելուց և անհրաժեշտ աջակցություն ցուցաբերելուց հետո Կենտրոն այցելեց Արագածոտնի մարզի փրկարար ջոկատը և հայտարարեց տագնապ, որից հետո սկսվեց տարհանումը: Դրանից հետո փրկարարները ցուցադրեցին, թե ինչպես պետք է դուրս բերել տուժածներին և ինչ աջակցություն ցույց տալ նրանց։

Իրականացված գործողություններից հետո ԱԻՆ ներկայացուցիչը ցուցադրեց հակահրդեհային վահանակի բաղադրիչների կիրառման եղանակները:

Բժշկական հետազոտություններ Աշտարակի «Սուրբ Մարիանե»
սոցիալական կենտրոնում

«Սուրբ Մարիանե» կենտրոնում իրականացվեց 54 կանանց, նաև երիտասարդ աղջիկների բժշկական հետազոտություն: Նրանց զննեցին գինեկոլոգը, էնդոկրինոլոգը, իրականացվեց սոնոգրաֆիա և վահանաձև գեղձի հետազոտություն:

Կենտրոն այցելեց գինեկոլոգ Գայանե Ավագյանը և կանանց հետ անցկացրեց զրույց և խորհրդատվություն, որի ընթացքում կանայք իրենց հուզող հարցերն ուղղեցին բժշկին և ստացան սպառիչ պատասխաններ:

Ուխտագնացություն դեպի Վայոց Ձոր

Հոկտեմբերի վերջին «Սուրբ Մարիանե» սոցիալական կենտրոնի 30 անդամ կատարեց հերթական ուխտագնացությունը, այս անգամ դեպի Վայոց Ձոր: Մասնակիցների մեծ մասն առաջին անգամ էր այս վայրերում:
Առաջին ուխտավայրը Խոր Վիրապն էր, որտեղ Կենտրոնի հոգևոր պատասխանատուն ներկայացրեց այս եկեղեցու պատմությունը, խոսեց Սուրբ Գրիգոր Լուսավորչի և նրա հրաշագործությունների մասին:

Արենիում այդ օրն անցկացվում էր ամենամյա ավանդական գինու փառատոնը: Արենին հայտնի է իր բերքառատ այգիներով և աչքի է ընկնում գինու տեսականու բազմազանությամբ։ Կենտրոնի անդամների համար շատ հետաքրքիր էր տեսնել և մասնակցել գինու փառատոնին, համեմատել այն իրենց բնակավայրում` Աշտարակում այս տարի առաջին անգամ անցկացված գինու փառատոնի հետ, որի շրջանակներում կազմակերպված ցուցահանդես-վաճառքին մասնակցեց նաև «Սուրբ Մարիանե» կենտրոնը։
Նորավանքում ուղխտավորները ծանոթացան վանքի պատմությանը, միասին աղոթեցին:
Այս ուխտագնացության ընթացքում նախատեսված էր իրականացնել ընտրված տարածքներն աղբից մաքրելու բնապահպանական ակցիա, որի համար բերվել էին ձեռնոցներ, տոպրակներ: Վերադարձի ճանապարհին երկու տարածք մաքրվեց պոլիէթիլենային տոպրակներից, ապակե և պլաստմասե շշերից և այլ տեսակի աղբից:

ԵՀԽ հայաստանյան Կլոր սեղան հիմնադրամի աջակցությամբ գործող «Սուրբ Մարիանե» սոցիալական կենտրոնում ավարտվել են վերակառուցման-վերանորոգման աշխատանքները՝ 3 փոքր սենյակը /որոնցից 2-ը նախկինում լուսամուտ չունենալու պատճառով օգտագործվել են որպես պահեստ/ վերակառուցվել, դարձել է 2 սենյակ, յուրաքանչյուրն ավելի մեծ մակերեսով, ավելի լուսավոր, նոր լուսամուտներով, դռներով, հատակով, լուսատուներով: Արդյունքում այսօր «Սուրբ Մարիանե» սոցիալական կենտրոնում արդեն գործում է 3 դասասենյակ երեխաների և ծնողների համար, ինչը բավականին արդյունավետ է դարձրել կենտրոնում իրականացվող աշխատանքները:


Ավելացել է ռուսերեն լեզվի դասավանդումը երեխաների և կանանց համար, և անգլերեն լեզվի` կանանց համար, բոլորն առայժմ կամավոր սկզբունքով:
Փոխվել է նաև շահառուների հաճախելիությունն ու տրամադրությունը` ավելի շատ մասնակիցներ են հաճախում կենտրոն և ավելի սիրով մասնակցում կենտրոնում կազմակերպվող դասընթացներին և միջոցառումներին:

Ձեռագործ աշխատանքներ, հուշանվերներ, Գավառի փախլավա, գաթա, կանեփով տոլմա, արևելյան քաղցրավենիք, համեմունքներ, Հաղարծնի մեղր, օշարակներ, մուրաբաներ էին ներկայացվել Եկեղեցիների համաշխարհային խորհրդի հայաստանյան Կլոր սեղան (Կլոր սեղան) հիմնադրամի տաղավարում: «Բերքի փառատոն 2018»-ին իրենց աշխատանքները և բերքն էին ներկայացրել Ջրվեժի, Քարակերտի, Գայի, Աշտարակի, Գավառի, Վարդենիսի, Իջևանի և Մեղրաձորի սոցիալական կենտրոնները, սիրիահայերի աջակցության ծրագրերի մասնակից սիրիահայ կանայք:


Գավառի կենտրոնը, օրինակ՝ ներկայացրել էր հետաքրքիր և յուրօրինակ ապրանք՝ կանեփով տոլմա: Մեծ պահանջարկ ունեին սիրիահայ կանանց ներկայացրած քաղցրավենիքը, ձեռքի աշխատանքները՝ սպասքի վրա, Կլոր սեղան հիմնադրամի կենտրոնները նույնպես յուրաքանչյուր տարվա պես, ներկայացրեցին իրենց աշխատանքները: Թեմերում գործող կենտրոններում գործում են տարբեր խմբակներ, որոնց մասնակիցները հաճախ են տարբեր ցուցահանդեսներին և փառատոներին ներկայացնում իրենց աշխատանքները:

ԵՀԽ հայաստանյան Կլոր սեղան հիմնադրամի աջակցությամբ հիմնադրված՝ Արագածոտնի թեմի «Սուրբ Մարիանե» սոցիալական կենտրոնի երեխաների և մեծահասակների համար կազմակերպվեց հերթական ուխտագնացություն` դեպի Երևանի հոգևոր և մշակութային վայրեր: Ուխտագնացությունն իրականացվել էր World Vision Armenia կազմակերպության հետ համագործակցության շրջանակներում՝ վերջինիս հովանավորությամբ: Պայմանավորվածություն էր ձեռք բերել Երևանի Մանկական պատկերասրահի ղեկավարության հետ այցելության համար, իսկ կենտրոն հաճախող կանայք և երեխաները խմորեղենի դասին պատրաստել էին խաչապուրի և ավանդական հայկական գաթա:

Միջոցառմանը մասնակցեցին «Սուրբ Մարիանե» կենտրոնի 37 շահառու կանայք, երեխաներ, ինչպես նաև աշխատակազմը և Կենտրոնի հոգևոր պատասխանատու Տեր Փառեն քահանա Առաքելյանը։
Կատարվեց այցելելություն Արաբկիր համայնքի նորակառույց Սուրբ Խաչ և Աբովյան փողոցում գտնվող Սուրբ Աննա եկեղեցիներ: Առաջինում` հոգևոր հովիվ Տեր Բաբկեն քահանան, և երկրորդում` Տեր Զենոն քահանան ուխտավորներին ծանոթացրեցին եկեղեցիների պատմությանը, կատարվեց միասնական աղոթք, իսկ երեխաները երգեցին Տերունական աղոթքը և մի քանի շարական, ստացան հոգևորականների օրհնությունը:
image7Մանկական ստեղծագործության պատկերասրահում երեխաները և մեծահասակները, մեծ հետաքրքրությամբ ծանոթանում էին աշխարհի տարբեր երկրների երեխաների ցուցադրված ստեղծագործություններին՝ նկարներին, քանդակներին, գորգագործության նմուշներին։ Մի քանի դահլիճում ներկայացված էին հայ երեխաների աշխատանքները: «Սուրբ Մարիանե» կենտրոնում երեխաները և կանայք մասնակցում են նկարչության դասընթացների, և Աշտարակ քաղաքում արդեն կազմակերպվել է նրանց նկարների ցուցահանդեսը: 
Պատկերասրահ այցելության նպատակն էր երեխաներին ծանոթացնել այլ երեխաների ստեղծագործություններին: Վերջում Տեր Փառեն քահանան և երեխաներից մի քանիսը իրենց տպավորությունների մասին գրեցին գրառումների գրքում: Ուխտագնացության ավարտին մասնակիցներն այցելեցին Երևանի հանրահայտ սննդի կետերից մեկը, որից հետո բարձր տրամադրությամբ վերադարձան Աշտարակ:

 

02.02Հունիսի 2-ին, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, կատարվեց Սաղմոսավանի նորակառույց հայորդյաց տան բացման արարողությունը: Սաղմոսավանի հայորդյաց տունը կառուցվել է Տեր և Տիկին Լևոն և Նադիա Քաբաբջյանների ազնիվ բարերարությամբ, ԵՀԽ Հայաստանյան Կլոր սեղան միջեկեղեցական բարեգործական հիմնադրամի ու Արի կանանց փոխադարձ օգնության միության օժանդակությամբ:


Արարողությանը ներկա էին Արագածոտնի թեմի առաջնորդ Գերաշնորհ Տ. Մկրտիչ եպիսկոպոս Պռոշյանը, Մայր Աթոռում պաշտոնավարող եպիսկոպոսները, Արագածոտնի թեմում սպասավորող հոգևորականները, Արագածոտնի մարզպետ Աշոտ Սիմոնյանը, Սաղմոսավան համայնքի ղեկավար Գևորգ Ավագյանը, Կլոր սեղան միջեկեղեցական բարեգործական հիմնադրամի ներկայացուցիչները և այս առիթով Հայաստան ժամանած Քաբաբջյան ընտանիքի անդամները:
Արարողությունն սկսվեց օրհնության կարգով, ապա ամենքը «Քրիստոֆ Արմեն Քաբաբջյան» սրահում ներկա գտնվեցին այս առիթով կազմակերպված միջոցառմանը:


02.03Բացման խոսքով հանդես եկավ Սաղմոսավանքի և Նոր Եդեսիայի հոգևոր հովիվ Արժանապատիվ Տ. Օշին քահանա Հայրապետյանը: Այնուհետև խոսք ասաց բարերար Նադիա Քաբաբջյանը՝ անդրադառնալով նորակառույց հայորդյաց տան կառուցմանը՝ ի հիշատակ իր որդու՝ Քրիստոֆ Քաբաբջյանի: Տիկին Քաբաբջյանը նաև շնորհակալություն հայտնեց Վեհափառ Հայրապետին՝ իրենց խնդրանքին ընդառաջելու և այս մտահաղացմանը ցուցաբերած աջակցության համար: Ողջույնի խոսքով հանդես եկան նաև Կլոր սեղան միջեկեղեցական բարեգործական հիմնադրամի ներկայացուցիչ Կարինե Բաղդասարյանը և Սաղմոսավան համայնքի ղեկավար Գևորգ Ավագյանը:


Ազգագրական երգերի ու պարերի կատարումներով հանդես եկան Աշտարակի «Գուլամերյան» հայորդյաց տան, Աշտարակի «Սուրբ Մարիանե» սոցիալական կենտրոնի, Սաղմոսավանի «Տաթև» համույթի սաները: Հանդիսության ավարտին ներկաներին ողջունեց Արագածոտնի թեմի առաջնորդ Մկրտիչ եպիսկոպոսը: Սրբազան Հայրն իր երախտագիտությունը հայտնեց Վեհափառ Հայրապետին, ինչպես նաև Կլոր սեղան հիմնադրամին ու Քաբաբջյան ընտանիքին Սաղմոսավանի հայրոդյաց տան կառուցմանը բերած իրենց անգնահատելի աջակցության համար: Սրբազանն այդ կապակցությամբ նաև իր շնորհակալությունը հայտնեց մարզային իշխանություններին՝ ի դեմս մարզպետ Աշոտ Սիմոնյանի, և շինարար Գագիկ Կարապետյանին:

02.13Միջոցառումն ամփոփվեց Գարեգին Բ Ամենայն Հայոց Հայրապետի օրհնության խոսքով: Նորին Սրբությունը նշեց, որ երեխաներին է ընծայաբերվում մի նոր կենտրոն՝ հայորդյաց տուն, որտեղ Սաղմոսավանի մանուկներն ու պատանիները պետք է ճանաչեն Աստծուն, ընդունեն Նրա պատգամներն ու պատվիրանները և կրթական հաստատության հարկի ներքո զարգացնեն ու զորացնեն իրենց տաղանդները՝ դառնալով արժանավոր զավակներն ազգի, հայրենիքի և մեր սուրբ Եկեղեցու: Նորին Սրբությունը գոհունակությամբ ընդգծեց, որ Սաղմոսավանի հայորդյաց տունը Երևանում և Հայաստանի տարբեր քաղաքներում ու համայնքներում Հայ Եկեղեցու հովանու ներքո գործող 10-րդ նույնաբնույթ կրթական հաստատությունն է: Վեհափառ Հայրապետը հայորդյաց տան բացման կապակցությամբ իր բարձր գնահատանքը փոխանցեց բարերարներին, Կլոր սեղան հիմնադրամին և բոլոր նրանց, ովքեր իրենց նպաստն են բերել կրթօջախի կառուցման գործում:


Ամենայն Հայոց Կաթողիկոսն առ Աստված աղոթքով հայցեց, որ Տերն Իր հանապազ օրհնության ներքո խաղաղ պահի մեր հայրենիքն ու աշխարհասփյուռ ժողովրդին: Վերջում Գարեգին Բ Հայրապետը՝ ուղեկցությամբ Մկրտիչ Սրբազանի և բարերարների, շրջեց նորակառույց հայորդյաց տանը և ծանոթացավ մանուկների համար ստեղծված պայմաններին:

Աղբյուր՝ Մայր Աթոռ Սուրբ էջմիածնի տեղեկատվական համակարգ:

 

 

Էջ 1, 2-ից

Տեսադարան

Պատկերասրահ

Հետադարձ կապ

[spmap lat="40.1618907" lng="44.2898331" zoom="14" height="100" maptype="ROADMAP"]

Մայր Աթոռ Սուրբ Էջմիածին,
Էջմիածին 1101, Հայաստան

Հեռ.` +374 10 517-157
Հեռ.` +374 10 517-216
Ֆաքս` +374 10 517-436