Նորություններ

DSC 8579Սեպտեմբերի 20-ին ՄԱԿ-ի հայաստանյան գրասենյակում բացվեց «Ես խաղաղության սերմնացան եմ» խորագրով երկրորդ համահայաստանյան նկարչական մրցույթի ամփոփիչ ցուցահանդեսը, որը նվիրված է Խաղաղության միջազգային օրվան: Մրցույթն անցկացվել է Եկեղեցիների համաշխարհային խորհրդի (ԵՀԽ) հայաստանյան միջեկեղեցական բարեգործական Կլոր սեղան հիմնադրամի կողմից իրականացվող «Հայաստան և հարևաններ. խաղաղության  փնտրտուք» ծրագրի շրջանակում՝ «Կանայք հանուն զարգացման» հասարակական կազմակերպության (ԿՀԶ ՀԿ) նախաձեռնությամբ, ՄԱԿ-ի հանրային տեղեկատվության վարչության (ՄԱԿ ՀՏՎ) երևանյան գրասենյակի և ՄԱԿ-ի հայկական ասոցիացիայի աջակցությամբ:

DSC 8573Այս տարվա մրցույթին մասնակցել է 613 դպրոցական Հայաստանի 11 մարզերի 101 դպրոցներից. սա գրեթե 4 անգամ գերազանցում է նախորդ մրցույթի մասնակիցների թիվը: Ցուցահանդեսի համար ընտրված 86 նկարների գրեթե բոլոր հեղինակները ներկա էին բացման հանդեսին իրենց ծնողների կամ ուսուցիչների ուղեկցությամբ:

Ներկաներին ողջունելով՝ ՄԱԿ ՀՏՎ երևանյան գրասենյակի ղեկավար Արմինե Հալաջյանն ասաց. «Ցավալիորեն, խաղաղության թեման ՄԱԿ-ի համար երբեք չի կորցնում արդիականությունը: Մինչդեռ 72 տարի՝ իր ստեղծման օրից, ՄԱԿ-ը կոչ է անում խաղաղության ու պատերազմներից զերծ մնալու: Խաղաղությունը վերջերս ուժի մեջ մտած Կայուն զարգացման նպատակների գաղափարախոսության առանցքային բաղադրիչներից մեկն է՝ առանց խաղաղության չի կարող լինել արդյունավետ աշխատանք կայուն զարգացման ուղղությամբ: Այդ նպատակներից 16-րդն ընդգրկում է խաղաղության գաղափարը»:

DSC 8609Մրցույթի նպատակն էր հատկապես սահմանամերձ բնակավայրերի երեխաների խաղաղության ուղերձը հասցնել տարբեր մակարդակների դերակատարներին, իսկ մասնակիցներին հնարավորություն տալ խորհելու, թե ինչ կարող է անել յուրաքանչյուրը, ինչ սերմեր կարող է ցանել, որ իր, իր համայնքի ու երկրի վաղվա օրը, մեր ընդհանուր մոլորակն ավելի կայուն ու խաղաղ լինեն: «Ես իմ նկարը նվիրում եմ հորեղբորս, որը զոհվել է դիրքերում»,- ասաց 11-ամյա Ռաֆայել Ուդումյանը Տավուշի մարզի Չորաթան գյուղից, որն իր «Խաղաղություն եմ ուզում իմ և տիկնիկիս համար» նկարում պատկերել է արև, հասկեր և մոլորակի կենտրոնում՝ իր տիկնիկին գրկած աղջնակ:

DSC 8593ԿՀԶ ՀԿ նախագահ Գոհար Մարկոսյանը նշեց, որ տեղական և միջազգային գործիչների  համար շատ կարևոր կլինի տեսնել, թե ինչպես են երեխաները վերաբերվում պատերազմին, ինչպես են փորձում ամեն կերպ հակազդել պատերազմի գաղափարախոսությանը: «Խաղաղության խորհրդանիշը մեր երեխաների համար արդեն վաղուց բանտարկված զենքերն են, տանկերը, որոնց փողերից արկերի փոխարեն ծաղիկներ ու փուչիկներ են դուրս գալիս, հրացանները, որոնք այնքան երկար ժամանակ չեն օգտագործվել, որ դարձել են հենարան նորատունկ ծառերի համար»,- նշեց տիկ. Մարկոսյանը: Նա մեջբերեց մրցույթի մասնակիցներից 9-ամյա Միլենայի ուղերձ-ցանկությունը. «Թող հավերժ լռեն բոլոր զենքերը և աշխարհում տիրի խաղաղությունը»:

DSC 8595«Երեխաների ստեղծագործությունները ուսանելի են և մտքին խաղաղություն են տալիս, ուղղորդում են մեզ և հիշեցնում, որ խաղաղությունը գին ունի և մեծագույն արժեք է»,- ասաց ԵՀԽ Կլոր սեղան հիմնադրամի ծրագրի պատասխանատու Ծովինար Ղազարյանը:

ՄԱԿ-ի հայկական ասոցիացիայի նախագահ Արմինե Պոդոսյանն էլ ավելացրեց, որ եթե մենք երազում ենք ավելի ապահով, խաղաղ ու զարգացած աշխարհի մասին, ապա պետք է որդեգրենք ընդհանրական մոտեցում և գիտակցենք, որ մարդու իրավունքները, խաղաղությունը, անվտանգությունն ու կայուն զարգացումը փոխկապակցված են: «Երիտասարդներին պետք է լսել, նրանց հետ պետք է աշխատել ապագայի մարտահրավերների ուղղությամբ: Քանի որ այսօր կերտվում է վաղվա աշխարհը, որտեղ ապրելու են այսօրվա երիտասարդները»,- ավելացրեց նա:

DSC 8602Միջոցառմանը ներկա Հայաստանում Ճապոնիայի դեսպան Էյջի Տագուչին ասաց, որ իր երկիրը Երկրորդ համաշխարհային պատերազմի ավարտից հետո կարևոր որոշում է կայացրել դառնալ աշխարհի ամենախաղաղասեր և խաղաղարար պետություններից մեկը: «Խաղաղությունը կառուցում են մեծերը, սակայն այն գալու է ձեր միջոցով, ձեր շնորհիվ և ձեզանով»,- եզրափակեց դեսպան Տագուչին:

Տարիքային 2 խմբերում մրցանակային առաջին տեղը զբաղեցրած մասնակիցների (Միլենա Հովհաննիսյան, 9 տ., Գյումրու Հայորդյաց տան քանդակի դասարանի սան, Ջուլիետա Պետրոսյան, 16 տ., Շիրակի մարզի Թորոսգյուղի միջնակարգ դպրոցի աշակերտ) աշխատանքների հիման վրա տպագրվել են բացիկներ, որոնք կտարածվեն տեղական և միջազգային կազմակերպությունների շրջանում: Մրցանակների արժանացան նաև Մարիանե Նազարյանը (2-րդ մրցանակ)՝ 7 տ., Արագածոտնի մարզի Ագարակ գյուղից, Արամ Զաքարյանը (3-րդ մրցանակ)՝ 7 տ., Արարատի մարզի Մասիս քաղաքից, Արման Վարդանյանը (2-րդ մրցանակ)՝ 13 տ., Լոռու մարզի Լեռնանցք գյուղ, Անահիտ Մինասյանը (3-րդ մրցանակ)՝ 14 տ., Տավուշի մարզի Ներքին Կարմիրաղբյուր գյուղ: Հատուկ մրցանակի արժանացավ 13-ամյա Սվետլանա Զալինյանը Լոռու մարզի Գարգառի միջնակարգ դպրոցից, որի նկարած աղավնին դարձել էր միջոցառման խորհրդանիշ: Ցուցադրված բոլոր աշխատանքների հեղինակներն ստացան հավաստագրեր ու հուշանվերներ: Նկարները կշարունակեն ցուցադրվել ՄԱԿ-ի հայաստանյան գրասենյակում մինչև սեպտեմբերի 29-ը:

DSC 8615Միջոցառման վերջում ՄԱԿ-ի հայկական ասոցիացիայի երիտասարդ ներկայացուցիչները մասնակից երեխաներին ինտերակտիվ եղանակով պատմեցին Կայուն զարգացման 17 նպատակների և հատկապես՝ այդ նպատակներից 16-րդի մասին:

***

Ամեն տարի սեպտեմբերի 21-ն ամբողջ աշխարհում նշվում է որպես Խաղաղության միջազգային օր: Այն ՄԱԿ-ի ընդհանուր վեհաժողովի կողմից հաստատվել է 1981 թվականին: Այս տարվա թեման է «Միասին հանուն խաղաղության. հարգանք, անվտանգություն և արժանապատվություն բոլորի համար»:

 

 

 

 

«Մխիթար Սեբաստացի» կրթահամալիրում Կլոր սեղան (ՀԿՍ) հիմնադրամի կողմից աջակցություն ստացած «Աշխատանքի միջազգային կամավորական ճամբարներ» ծրագրի շրջանակում կազմակերպվել էր միջոցառում հայ և բելգիացի  կամավորների մասնակցությամբ: Հայ երիտասարդական «Տիեզերք» երաժշտական խումբը հանդես եկավ տարբեր կատարումներով: Միջոցառմանը ներկա էին նաև Մխիթար Սեբասատացի կրթահամալիրի տնօրինությունը, սաներըՀԿՍ-ի և Կամավորական ջոկատների ներկայացուցիչները:

2017թ. մարտի 31-ից հունիսի 30-ը «Աշխատանքի միջազգային կամավորական ճամբարներ» ծրագրի շրջանակում հավաքագրվել են հայ և օտարերկրացի 107 կամավորներ, լուծվել են նրանց տեղափոխման, կացության և զբաղվածության հարցերը: Հուլիս-հոկտեմբեր ամիսներին նախատեսվում է կամավորների հետ կազմակերպել և իրականացնել բարեկարգման և վերանորոգման աշխատանք 8 ճամբարներում: Բոլոր ճամբարների կամավորների համար կկազմակերպվի մեկօրյա այց Գեղարդավանք, որի ընթացքում նրանք կբարեկարգեն և կմաքրեն վանքի տարածքը, կմասնակցեն վանահայրերի՝ կրոնական հարցերին առնչվող դասախոսությանը և քննարկումներին:

Մայր Աթոռ Սուրբ Էջմիածնի Գևորգյան  հոգևոր ճեմարանի 2 սան ընդգրկված ենճամբարների կազմում որպես կամավորներ և ներկայացնում են Հայ Առաքելական եկեղեցու պատմությունը, քրիստոնեական արժեքները, քույր եկեղեցիների հետ հարաբերությունները և էկումենիկ համագործակցությունը մյուս կամավորներին:

Կլոր սեղան հիմնադրամի, «Կանայք հանուն զարգացման» հասարակական կազմակերպության և ՄԱԿ-ի Երևանյան գրասենյակի ներկայացուցիչներն ավարտեցին «Ես խաղաղության սերմնացան եմ» մրցույթի նկարների վերջնական ընտրությունը

«Հայաստան և հարևաններ. խաղաղության փնտրտուք» ծրագրի շրջանակում իրականացվող «Ես խաղաղության սերմնացան եմ» ծրագիրը հայտարարել էր նկարների մրցույթ  Հայաստանի մարզերի և Երևանի՝ 7-1 1և 12-17 տարեկան դպրոցականների համար:

Մրցույթին մասնակցել է ավելի քան 600 նկար: Հանձնաժողովն ընտրել է 50 լավագույն նկարները, որոնք, մրցանակային տեղեր զբաղեցրած նկարների հետ, Խաղաղության միջազգային օրը՝ սեպտեմբերի 21-ին, կցուցադրվեն ՄԱԿ-ի հայաստանյան գրասենյակում: Տարիքային 2 խմբերում 1-ին, 2-րդ և 3-րդ տեղերը զբաղեցրած 6 մասնակիցները կստանան հատուկ մրցանակներ: Առաջին մրցանակների արժանացած 2 մասնակիցների նկարների հիման վրա կտպագրվեն բացիկներ, որոնք կտարածվեն Հայաստանում և արտերկրում

 

Լոռու մարզի Վանաձոր քաղաքի Սուրբ Գրիգոր Նարեկացի եկեղեցում «Սովորելով խաղաղություն. Խաղաղության ակումբ» ծրագրի շրջանակներում տեղի ունեցավ նախատեսված հինգ հանդիպում-քննարկումներից մեկը: Ծրագիրն իրականացնում է «ՄԵՆՔ» Լոռու մարզի երիտասարդական հասարակական կազմակերպությունը՝ ՀԿՍ-ի ֆինանսական աջակցությամբ:


Հանդիպմանը մասնակցում էր մոտ 30 երիտասարդ: Ծրագրի նպատակն էր բարձրացնել վանաձորցի երիտասարդների իրազեկվածության մակարդակը և փոխանցել նրանց գիտելիքներ կոնֆլիկտների տեսակների, կոնֆլիկտների կարգավորման կարևորության, կոնֆլիկտների պատճառով առաջացած հետևանքների, այդ գործընթացներում տարբեր կառույցների դերի և այլ հարակից թեմաների վերաբերյալ:


Հանդիպմանը մասնակցում էին «Ինտեգրացիա և զարգացում» հասարակական կազմակերպության նախագահ, քաղաքական վերլուծաբան, ՀԿՍ խաղաղության ծրագրի խորհրդատու Արամ Սաֆարյանը, ՀԿՍ ծրագրի պատասխանատու Ծովինար Ղազարյանը և Սլավոնական համալսարանում իրականացվող «Կոնֆլիկտի ձևափոխումը և լուծումը բանակցությունների միջոցով» դասընթացի շրջանավարտ Հարություն Կարապետյանը:


Սաֆարյանը խոսեց «Քաղաքական փնտրտուքներ Լեռնային Ղարաբաղի հակամարտության մեջ (պատմություն, իրականություն և ապագա)» թեմայով: Քննարկվեցին նաև տարածաշրջանում տեղի ունեցող զարգացումները և Ղարաբաղի հակամարտության ազդեցությունը ողջ տարածաշրջանի վրա: Հարություն Կարապետյանը մասնակիցների հետ քննարկեց փափուկ ուժի հասկացությունը և փոքր պետությունների հնարավորությունները փափուկ ուժի շնորհիվ:
Թեմաների ամփոփման փուլի ավարտից հետո երիտասարդ ակտիվիստներն ուղղեցին իրենց կուտակված հարցերը թեմաների վերաբերյալ և համատեղ քննարկեցին դրանք:


Քննարկումների ավարտին «ՄԵՆՔ» Լոռու մարզի երիտասարդական ՀԿ-ի ջանքերով Վանաձորի քաղաքի Նարեկացի փողոցում՝ հայ-վրացական միջպետական ճանապարհին, երիտասարդները ստեղծեցին «Խաղաղության պատ», որի վրա գրեցին խաղաղության թեմայով թևավոր խոսքեր:

Խաղաղության և երկխոսությանը նվիրված սիմուլյացիոն խաղեր՝ Ռուս-հայկական (Սլավոնական) համալսարանում: Հունիսի 19-ին բուհում ներկայացվեց ԵՀԽ հայաստանյան Կլոր սեղան հիմնադրամի «Հայաստան և հարևաներ. խաղաղության փնտրտուք» ծրագրի աջակցությունն ստացած փոքրածավալ ծրագրերից մեկը: Գաղափարի հիմքում կոնֆլիկտի վերաբերյալ ստացած գիտելիքները սիմուլիացիոն խաղերի միջոցով հասակակիցներին հասցնելն էր: Միջոցառմանը մասնակցեց էր համալսարանի տարբեր բաժինների 16 ուսանող: Հեղինակները և իրականացնողները «Կոնֆլիկտի ձևափոխումը և լուծումը բանակցությունների միջոցով» դասընթացի երեք շրջանավարտներն էին:


Մեկ ու կես ժամ տևած ակտիվ խաղերից ու քննարկումներից հետո մասնակից ուսանողները մեծ ցանկություն հայտնեցին մասնակցել նմանատիպ սեմինարների և «Կոնֆլիկտի ձևափոխումը և լուծումը բանակցությունների միջոցով» դասընթացին:

Հունիսի 8-ին Արմավիրի մարզի Քարակերտ համայնքի Գրիգոր Նարեկացու հոգևոր մշակույթի կենտրոնում ցուցադրվեց Հովհաննես Թումանյանի «Անխելք մարդը» ներկայացումը: Ներկայացումը պատրաստվել էր կենտրոնի ուսուցիչների և հաճախող սաների համատեղ ջանքերով: Համայնքի երեխաները հնարավորություն ունեցան փոքր-ինչ կտրվել առօրյայից և հայտնվել հեքիաթի աշխարհում:
Ներկայացման կազմակերպիչները տեղեկացրեցին, որ հունիսին ցուցադրվելու են «Անբան Հուռին» և «Պույ-պույ մկնիկը» ներկայացումները ևս: Թատերախումբը նախատեսում է ներկայացումներով հանդես գալ նաև հարևան համայնքներում և ամառային ճամբարներում:

Քարակերտ համայնքի Գրիգոր Նարեկացու հոգևոր մշակույթի կենտրոնի ծրագիրը ֆինանսական աջակցություն է ստանում Եկեղեցիների համաշխարհային խորհրդի հայաստանյան Կլոր սեղան (ՀԿՍ) հիմնադրամից: Թատերական խմբակից զատ, կենտրոնում գործում է նախակրթարան, նաև դաշնամուրի, կիթառի, նկարչության, կարպետի արտադպրոցական խմբակներ, որոնք օգնում են կազմակերպել համայնքի երեխաների ազատ ժամանակն ու նպաստում են գեղագիտական դաստիարակությանը:

 


Մայիսի 30-ից հունիսի 2-ը Չեխիայի մայրաքաղաք Պրահայում անցկացվեց դիակոնիայի հետազոտություններին նվիրված աշխատանքային հանդիպում: Կազմակերպիչներն էին Միջազգային դիակոնիա կազմակերպությունը, Կենտրոնական և Արևելյան Եվրոպայում դիակոնիայի և սոցիալական գործունեության ակադեմիան: Միջոցառմանը մասնակցեցին Կենտրոնական և Արևելյան Եվրոպայի 10 երկրից ժամանած համալսարանների, ուսուցողական կենտրոնների դիակոնիա և կամավորական աշխատանք իրականացնող 13 մասնակիցներ: Եկեղեցիների համաշխարհային խորհրդի հայաստանյան Կլոր սեղան (ՀԿՍ) հիմնադրամի աշխատակիցները նույնպես մասնակցեցին աշխատանքային հանդիպմանը՝ կազմակերպելով և վարելով այն: ՀԿՍ ներկայացուցիչները հանդիպման մասնակիցներին ներկայացրեցին հիմնադրամի փորձը՝ համայնքային զարգացման գործում իր աշխատանքի ազդեցությունը գնահատելու հարցում:

Աշխատանքային հանդիպման ընթացքում մասնակիցները միմյանց հետ կիսում էին իրենց փորձը, անդրադառնում տարբեր թեմաների հետազոտությունների կարիքներին: Փորձագետների խումբը սահմանեց ուսումնասիրության կարիք զգացող առաջնահերթ ոլորտների և թեմաների շրջանակը, կիսեց տեսակետներ դիակոնիայի կազմակերպչական կառուցվածքի, դիակոնիայի խնդիրների, իրականացման մեթոդների և աստվածաբանական ընկալումների վերաբերյալ: Միջոցառումը հիմք դրեց մի հարթակի, որի նպատակն է աջակցել Միջազգային դիակոնիա կազմակերպության՝ տարբեր հարանվանություններ ներկայացնող անդամների միջև դիակոնիայի մասին գիտելիքի զարգացմանը ու տարածմանը և շարունակական ուսումնասիրությանը: Հանդիպման ավարտին մասնակիցները նաև քննարկեցին նորաստեղծ հարթակի գործունեության զարգացման հեռանկարները:

56 սիրիահայ ներկայացրեց 2016թ. նոյեմբերին մեկնարկած դասընթացների արդյունքում ձեռք բերած գիտելիքը: Եկեղեցիների համաշխարհային խորհրդի Հայաստանյան կլոր սեղան (ԵՀԽ Հայաստանյան Կլոր սեղան/Կլոր սեղան) հիմնադրամի դահլիճում կայացած միջոցառման ընթացքում սեղանի ձևավորման, վարսահարդարման, մատնահարդարման, դիմահարդարման, զգեստների մոդելավորման և օտար լեզուների դասընթացների մասնակիցները ներկայացրեցին իրենց գործնական գիտելիքի առաջին արդյունքները: Դասընթացն իրականացրել է «Արտ Հաուս» ուսումնական կենտրոնը: Նախաձեռնությունը կյանքի է կոչվել Կլոր սեղան հիմնադրամի` Արտակարգ իրավիճակների արագ արձագանքման ծրագրերի շրջանակում` «Հալեպ» Հ/Կ հետ համատեղ: Այն մաս է կազմում «Աջակցություն փախստականներին Հայաստանում» ընդհանուր ծրագրի:

«Սիրիահայերին աշխատանքով ապահովելը կարևոր խնդիր է, որի լուծմանն է ուղղված մեր ծրագրերի մի մասը: Այսօրվա միջոցառումն առիթ է ամփոփելու կատարած աշխատանքը»,- ասաց Կլոր սեղան հիմնադրամի գործադիր տնօրեն Կարեն Նազարյանը: «Այս դասընթացների շնորհիվ արդեն հարյուրավոր սիրիահայ կանայք հնարավորություն են ունեցել իրենց գիտելիքի շնորհիվ գումար վաստակել, և անցած տարիներին ավարտած կանայք դա կվկայեն: Մենք այսօր սերմեր ենք ցանել, որոնց պտուղները կվայելեք հետագայում»,- նշեց «Արտ Հաուս» կենտրոնի տնօրեն Լիլիթ Կարապետյանը: «Հալեպ» հասարակական կազմակերպության նախագահ Անի Պալխյանը նշեց, որ Սիրիայի քաղաքացիական պատերազմի հետևանքով հայրենիքում ապաստանած յուրաքանչյուր սիրիահայի բարեկեցության ապահովման համար անհրաժեշտ է աշխատանք ունենալ: Դասընթացի մասնակիցները նշեցին, որ ստացած գիտելիքով կփորձեն աշխատանք գտնել Հայաստանում և մնալ այստեղ` կառուցելով իրենց ընտանիքի ապագան: 2015թ. անցկացված` սեղանի ձևավորման և ֆուրշետների կազմակերպման դասընթացի մասնակից մի քանի սիրիահայ էլ շեշտեց, որ արդեն ունի աշխատանք և մշտական պատվերներ է կատարում տարբեր կազմակերպությունների համար:

DSC 4153«Արտ Հաուսի» մասնագետները սիրիահայերին սովորեցրել են կար ու ձև, հագուստի մոդելավորում, սեղանի ձևավորում, խոհարարություն, վարսահարդարում, մատնահարդարում, դիմահարդարում, լեզուներ: Որպեսզի ուսուցումը լինի արդյունավետ, կազմակերպիչները հարցաշարերի միջոցով սիրիահայերից պարզել են նրանց կարիքները, խնդիրները և ուսուցման նախասիրությունները: Հարցաթերթիկների տեղեկության մշակումից հետո կազմավորվել են համապատասխան խմբերը: Այդպիսով` Կլոր սեղան հիմնադրամը որոշ չափով փորձել է մեղմել սիրիահայերի սոցիալական վիճակը և տալ նրանց հնարավորություն` մնալու և աշխատելու Հայաստանում` նոր արժեքներ ստեղծելով հայրենի հողի վրա:


Դասընթացի ֆինանսավորումն իրականացվելու է միջեկեղեցական միջազգային "ACT Alliance" («Եկեղեցիների համատեղ գործողություն» դաշինք) կազմակերպության անդամ 2 եկեղեցիների տրամադրած դրամաշնորհի միջոցով: Նույն դրամաշնորհի միջոցով մեկնարկել է նաև սիրիահայ փախստականների սոցիալ-հոգեբանական աջակցության ծրագիրը, որի ընթացքում հոգեբանները «Հալեպ» Հ/Կ-ում աշխատում են մեծահասակների և երեխաների խմբերի հետ:

 

ԵՀԽ հայաստանյան Կլոր սեղան հիմնադրամը (ՀԿՍ) հայտարարում է փոքրածավալ ծրագիր-առաջարկների մրցույթ «Հանուն խաղաղ հարևանության» խորագրով: Ողջունելի են երիտասարդական և հասարակական կազմակերպությունների նորարարական նախաձեռնությունները:
Ծրագիր առաջարկը պետք է հանրության ստվար զանգվածների մատչելի կերպով հասցնի «խաղաղ հարևանության» ուղերձը:
Փոքր ծրագրերը կարող են ընդգրկել, բայց չսահմանափակվեն արդյունավետ երկխոսություններով, բաց դռների հանդիպումներով կամ ֆլեշ մոբերով:
Ընտրության չափանիշներ
Նախապատվություն կտրվի այն հասարակական կազմակերպություններին, որոնք

- ծրագրում կունենան 20% ֆինանսական ներդրում,
- հարում են «հանուն խաղաղ հարևանության» գաղափարին,
- զբաղվում են կոնֆլիկտի ձևափոխմամբ, խթանում են մարդու իրավունքները և ժողովրդավարությունը,
- ունեն վերոնշյալ ոլորտում աշխատելու փորձ,
- ծրագրով նախատեսված գործողություններում կընդգրկեն առնվազն 50 մարդ,
- ծրագրի փորձը կկարողանան տարածել և կրկնօրինակել ,
- նախատեսում են համագործակցություն այլ երիտասարդական ծրագրերի ու քաղաքացիական հասարակության կազմակերպությունների միջև, որոնք ակտիվ են կոնֆլիկտի ձևափոխման և խաղաղաշինության ոլորտում,
- կաշխատեն ազգային կամ տարածաշրջանային մակարդակով:

Ծրագիր-առաջարկ ներկայացնելու կարգը և վերջնաժամկետը
Խնդրում ենք լրացնել ծրագիր-առաջարկի և նախահաշվի ձևանմուշները:
Ֆայլերը հասանելի են հետևյալ հղումով` https://drive.google.com/drive/folders/0B8acACjFy9EhN3FjZGpYN2tyRk0?usp=sharing
Ծրագիր-առաջարկները կարող եք ներկայացնել մինչև ս.թ. մարտի 27-ը հետևյալ հասցեով`Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։
Մրցույթի արդյունքները կհրապարակվեն 2017թ. ապրիլի 10-ին:
Հարցերի դեպքում կարող եք զանգահարել Անահիտ Թերզիկյանին` հետևյալ հեռախոսահամարներով ` (+37410) 517 157, (+37410) 517 216:

«Հերացի» ավագ դպրոցի գրադարանային ռեսուրս կենտրոնն ակտիվ ընթերցողների շնորհիվ  Զանգակ հրատարակչության կողմից  Գրքի տոնի կապակցությամբ հայտարարված մրցույթում դարձել է հաղթող գրադարաններից մեկը:  Հրատարակչությունը փետրվարի 10-17-ին հայտարարել էր նաև «Ընտրիր, ընծայագրիր և նվիրիր»  մրցույթ: Մոտ 800 ընծայագրողներից հաղթող են ճանաչվել 25-ը, որոնցից    5-ը  «Հերացի» ավագ դպրոցի աշակերտներ և ուսուցիչներ են: «Զանգակ» հրատարակչությունը նվեր-գրքեր է սահմանել հաղթողների համար: 

«Հերացի» ավագ դպրոցը ստեղծվել է Եկեղեցիների համաշխարհային խորհրդի Հայաստանյան Կլոր սեղան հիմնադրամի աջակցությամբ:  Ծրագրի նպատակն է եղել «Հերացի» ավագ դպրոցում ստեղծել տեղեկատվական գրադարանային ռեսուրս կենտրոն, որը դպրոցի աշակերտներին հնարավորություն է տվել ավելի արդյունավետ կազմակերպել ինքնակրթության գործընթացըծանոթանալ միջազգային ծրագրերին: Դպրոցի ուսուցիչները կարող են  ծանոթանալ կրթական նորություններին և նորարարություններին, միջազգային վերապատրաստումներին և պատրաստել ՏՀՏ դասեր:

 

 

 

Տեսադարան

Պատկերասրահ

Հետադարձ կապ

[spmap lat="40.1618907" lng="44.2898331" zoom="14" height="100" maptype="ROADMAP"]

Մայր Աթոռ Սուրբ Էջմիածին,
Էջմիածին 1101, Հայաստան

Հեռ.` +374 10 517-157
Հեռ.` +374 10 517-216
Ֆաքս` +374 10 517-436