Նորություններ

Տիկնիկային արվեստի գործիչների միջազգային միության հայկական կենտրոն ՅՈՒՆԻՄԱ-Հայաստանը արդեն տասնչորսերոդ տարին է, ինչ Հայաստանում անցկացնում է «Թումանյանական հեքիաթի օր» տիկնիկային թատրոնների միջազգային ամենամյա փառատոնը: Այն նպատակ ունի ամրապնդել Հայաստանի միջազգային մշակութային կապերը, աշխուժացնել մշակութային կյանքը մարզերում, հեռավոր և սահմանամերձ բնակավայրերում, աջակցել երեխաների գեղագիտական դաստիարակությանը, նպաստել Թումանյանի և իր ստեղծագործությունների հանրահռչակմանը:

IMG 2529

Այս տարի փառատոնը նվիրված է հայ մեծանուն գրող, մանկագիր և մանուկների մեծ բարեկամ Հովհաննես Թումանյանի ծննդյան 150-ամյա հոբելյանին, որն ընդգրկված է ՅՈՒՆԵՍԿՕ-ի Հռչակավոր մարդկանց և կարևոր իրադարձությունների հոբելյանների 2018-2019թթ. օրացույցում: ՀՀ Վարչապետի կարգադրությամբ ստեղծված է կառավարական հանձնաժողով:

IMG 2514

Փառատոնին մշտապես աջակցել է Հայաստանի Հանրապետության կառավարությունը: Այս տարի ևս փառատոնը հովանավորել են ՀՀ կրթության, գիտության, մշակույթի և սպորտի և նախարարությունը: Այս տարի Եկեղեցիների համաշխարհային խորհրդի հայաստանյան Կլոր սեղան հիմնադրամը միացել է մյուս աջակիցներին՝ «Գրանդ Քենդի» ընկերությանը, Զանգեզուրի պղնձամոլիբդենային կոմբինատին, Ամերիկայի Հայ Ավետարանչական ընկերակցությանը, փառատոնին օժանդակել են Լոռու, Սյունիքի, Վայոց Ձորի, Տավուշի մարզպետարանները, այլ կազմակերպություններ և ընկերություններ:

IMG 2528

Փառատոնի մեկնարկը տեղի ունեցավ սեպտեմբերի 15-ին Դսեղ գյուղում՝ Հովհ. Թումանյանի հուշարձանին ծաղկեպսակների զետեղման արարողությամբ: Այնուհետև տեղի ունեցավ թատերականացված բացօթյա տոնախմբություն, ապա սկսվեցին փառատոնի առաջին ներկայացումները: Ներկայացումներն անվճար կցուցադրվեն Լոռու, Տավուշի, Վայոց Ձորի, Սյունիքի մարզերի տարբեր քաղաքներում, գյուղերում ու ավաններում, Երևանում և Թբիլիսիում: Փառատոնի ավարտին մասնակիցներին կշնորհվեն մրցանակներ և պատվոգրեր: Կտրվեն տիկնիկային արվեստի վարպետության և տիկնիկագործության դասեր, կանցկացվեն էքսկուրսիաներ, կցուցադրվեն տեսաֆիլմեր:

IMG 2513

Ի նշանավորումն Հայաստանի Հանրապետության անկախության տարեդարձի և Խաղաղության միջազգային օրվա, հանդիսավոր արարողություն տեղի կունենա Երևանի «Հանրապետության հրապարակ» մետրոյի կայարանի հարևանությամբ գտնվող «Խաղաղության ծառի» մոտ, որը 2015 թ. հունիսի 3-ին, Հայոց ցեղասպանության 100-րդ տարելիցի տարում, հինգ մայրցամաքներից բերված հող ու ջրով տնկել են «Տիկնիկները հանուն խաղաղության և միջմշակութային երկխոսության» համաշխարհային երթի և «Թումանյանական հեքիաթի օր» տիկնիկային թատրոնների միջազգային 10-րդ փառատոնի մասնակիցները:

IMG 2566

Փառատոնին մասնակցելու են 15 տիկնիկային թատրոններ Երևանից, Հայաստանի տարբեր մարզերից, Արցախից, (74 մասնակից) և 9 տիկնիկային թատրոններ արտասահմանից (63 մասնակից), այդ թվում Վրաստանից, Չինաստանից, Ռուսաստանի Դաշնությունից, Իտալիայից: Փառատոնի մասնակից արտասահմանյան թատրոնները առաջին անգամ ցուցադրելու են նաև թումանյանական ստեղծագործությունների մոտիվներով տիկնիկային ներկայացումներ: Փառատոնի ներկայացումները կդիտեն մոտ 8000 երեխաներ և մեծահասակներ:

Ավարտվեց Հայաստանի Աստվածաշնչային Ընկերության ամառային էկումենիկ ճամբարը` համագործակցությամբ ԵՀԽ հայաստանյան Կլոր սեղան հիմնադրամի, որն այս տարի տեղի ունեցավ հուլիսի 8-13-ը՝ Հայ Առաքելական Եկեղեցու Գուգարաց թեմի «Ծիծեռնակ» ճամբարում: Ծրագրին մասնակցել են 11-16 տարեկան 63 պատանիներ, 7 ջոկատավարներ, 2 սարկավագներ և 8 ղեկավար կազմ: Պատանիները ճամբարային հագեցած 6 օրվա ընթացքում մասնացկել են տարբեր մրցույթների, վիկտորինաների, սեմինարների, դասընթացների և այլ բովանդակալից միջոցառումների: Քննարկվող թեմաներից են եղել ընտանեկան բռնության կանխարգելումը, անցկացվել են աստվածաշնչյան ընթերցումներ, հայկական ավանդույթների և ծեսերի մասին լսումներ, խեցեգործության դասընթացներ, հանդիպումներ հոգեբանի հետ:

Հիանալի շենքային պայմաններ ունեցող ճամբարի մասնակիցների թվում էին պատանիներ Հայ Առաքելական, Հայ Կաթողիկէ, Հայ Ավետարանական Եկեղեցիներից, ասորի, հույն և եզդի համայնքներից: Նրանց ուղեկցել, և հոգևոր գիտելիք են փոխանցել Գևորգյան հոգևոր ճեմարանի ուսանողները, Հայ Առաքելական եկեղեցու հոգևորականներ: Դասընթացներ են անցկացրել առաջատար մասնագետներ, փորձագետներ: Այս տարի առաջին անգամ է, որ ճամբարի կազմակերպիչները որոշել էին ընդգրկել նաև տղաներին:

Արտաշատից ժամանած Մարիամը նշում է, որ իր համար ճամբարը նշանավորվել է նոր ընկերների ձեռքբերումով, նոր հոգևոր գիտելիքի պաշարով և անչափ հետաքրքիր և հագեցած առօրյայով:

Ասորի համայնքից Արաքսյա Ավչիևան իրեն համայնքի պատանիների ջոկատավարն է: Ասում է, որ աննկարագրելի և հույժ օգտակար 6 օր են անցկացրել: «Անշուշտ, կարևոր է, որպեսզի մեր համայնքը շփվի այլ համայնքների հետ: Այդպես մենք միմյանց ավելի լավ ենք ճանաչում»,- նշում է Ավչիևան: Լուսինե Ավչյանը փաստում է. «Ես նախկինում մի քանի ճաբարների եմ մասնակցել: Եթե առաջ օրերն էի հաշվում, թե երբ եմ վերադառնալու տուն, այս ճամբարից չեմ ուզում հեռանալ: Մայրս այնքան զարմացած էր, որ նման փոփոխություն է եղել իմ մեջ: Ես արցունքն աչքերիս եմ բաժանվելու ընկերներիցս»:

Ասորի համայնքից Իոսիֆ Աբրամովը, Անդրեյ Միրզոևը և Հրանտ Գրիգորյանը համաձայն էին ջոկատավարի հետ: Նրանք հատկապես կարևորեցին ասորի ժողովրդի մասին պատմելու հնարավորության և նոր ընկերներ ձեռք բերելու հնարավորությունները:

Կիսով չափ ասորի Աննա Ղազարյանն էլ ասում է. «Այս ճամբարի շնորհիվ ես ավելի սկսեցի հետաքրքրվել իմ ասորական արմատներով: Ասորերեն ես սովորել եմ տատիկիցս: Հիմա ավելի շատ ուշադրություն կդարձնեմ: Մինչև հիմա ես ակտիվորեն ներգրավված եմ եղե Հայ Առաքելական Եկեղեցու համայնքին»,- ասում է Աննան:

Ճամբարը եզրափակվեց հայկական ավանդական երգերով ու պարերով, ինչպես նաև ծեսերի բեմականացմամբ:

ԵՀԽ հայաստանյան Կլոր սեղան հիմնադրամի ծրագրերի պատասխանատու Ալլա Սարկիսովան, «Երիտասարդները հանուն քրիստոնեության» ՀԿ-ի տնօրեն Արև Սարուխանյանն ու կազմակերպության կամավոր Անժելան, այցելեցին Ալավերդի քաղաքի ցերեկային կենտրոն: Այն իր 2018-19 թթ.-ի գործունեությունն իրականացնում է շնորհիվ վերոնշյալ կազմակերպությունների, ինչպես նաև՝ Ամերիկայի հայ ավետարանչական ընկերակցության համաֆինանսավորման։ Այցելության նպատակներն էին՝ ծանոթանալ կենտրոնի գործունեությանը, բացահայտել ուժեղ և թույլ կողմերը, քաջալերել ուսուցիչներին և երեխաներին։


Կենտրոնում երեխաները սնվում են և հնարավորություն ունեն բարելավելու իրենց մայրենի և անգլերեն լեզուների, մաթեմատիկայի կրթական մակարդակը։ Նշված առարկաների մասնագետներն անհատական մեթոդով են աշխատատում յուրաքանչյուր աշակերտի հետ դասապատրաստման ընթացքում։ Արդյունքում էապես բարձրացել է երեխաների առաջադիմությունը: Իսկ կենտրոնի կամավորներն առօրյան դարձնում են ավելի ակտիվ և հետաքրքիր՝ խաղերի, էքսկուրսիաների և պատմամշակութային վայրեր, թանգարաններ այցելության միջոցով։ Կենտրոն է հաճախում սոցիալապես անապահով ընտանիքների 3-6-րդ դասարանների 30 երեխա։ Այս տարի կենտրոնն ունի 7 շրջանավարտ։


Կենտրոնի սոցիալական աշխատող Գայանե Շարբաթյանը պատմում է, որ կենտրոնի սաների ծնողների համար կազմակերպվող ամենամսյա սեմինար-հանդիպումները տալիս են հրաշալի արդյունք։ Ծնողների վկայությամբ՝ փոխվել է իրենց վերաբերմունքը երեխայի դաստիարակության նկատմամբ։ Սկսել են ավելի լավ ճանաչել իրենց երեխաներին։ Դաստիարակության մեջ նրանք այլևս չեն կիրառում բռնություն։ Չափազանց անկեղծ են, պատրաստ խոսելու իրենց անհանգստացնող հարցերի մասին։ Չնայած կենտրոնն ունի սենյակային և գույքային սուղ պայմաններ, բայց դա երեխաներին չի խանգարում իրենց ժամանակն արդյունավետ կազմակերպել դասերից հետո՝ հաճախելով Ալավերդի քաղաքի միակ ցերեկային կենտրոն, ձեռք բերելու նոր գիտելիք և հրաշալի ժամանակ անցկացնելու ընկերների հետ։

 

 

Եկեղեցիների համաշխարհային խորհրդի հայաստանյան միջեկեղեցական բարեգործական Կլոր սեղան հիմնադրամը հաջողությամբ ավարտեց հումանիտար օգնության բաշխումը կարկտահարությունից առավել տուժած Լոռու մարզի Դսեղ և Շիրակի մարզի Հառիճ, Առափի և Ոսկեհասկ համայնքներում:
Ծրագրի իրականացման շրջանակում 4260 մարդ ստացավ մեկական պարկ ալյուր և արևածաղկի ձեթ, որը կապահովի յուրաքանչյուր ընտանիքի սնունդն առաջիկա 3 ամիսների համար:


Ծրագրի իրականացմանն աջակցեցին Հայ Առաքելական Սուրբ Եկեղեցու սոցիալական բաժինը՝ հանձին Տեր Մարկոս քահանա Մանգասարյանի, և նշված համայնքների հոգևոր հովիվները, ինչպես նաև՝ կամավորներ համայնքներից: Դսեղ, Ոսկեհասկ համայնքներում օգնության բաշխմանը մասնակցեցին նաև մարզպետարանների ներկայացուցիչները և ՀՀ տարածքային կառավարման և զարգացման նախարարի օգնական Արմեն Մարտիրոսյանը:

 

 

Children are dancing during the opening ceremonyՏեղի ունեցավ Ալավերդու համայնքի թիվ 3 մանկապարտեզի երկրորդ մասնաշենքի բացման հանդիսավոր արարողությունը: Սանաhին երկաթուղային կայարանում տեղակայված մանկապարտեզի վերանորոգումն իրականացվել է Եկեղեցիների համաշխարհային խորհրդի հայաստանյան Կլոր սեղան (ՀԿՍ) հիմնադրամի, «Հարավկովկասյան երկաթուղի» (ՀԿԵ) ՓԲԸ-ի և տեղական ձեռնարկությունների աջակցությամբ: ՀԿՍ-ն ֆինանսավորել է նոր դռների ու պատուհանների ու լամինատե հատակի տեղադրումը: ՀԿԵ-ին իրականացրել է տանիքի վերանորոգում և ներքին հարդարման աշխատանքներ, օգտագործելով սեփական նյութերը և աշխատուժը, ինչպես նաև մասնաշենքի կահավորումը, մանկապարտեզի բակի և խաղահրապարակի վերականգնումը:


ՀԿԵ-ի արհմիությունների միությունը տրամադրել է սարքավորումներ և նյութեր տաք ջրի և ջեռուցման համակարգի համար: Բացման արարողությանը ներկա էին մանկապարտեզի սաները, նրանց ծնողներն ու հարազատները, մանկապարտեզի աշխատակիցները, Ալավերդու քաղաքապետ Սասուն Խեչումյանը, Հայաստանում Ռուսաստանի Դաշնության Արտակարգ և լիազոր դեսպան Սերգեյ Կոպիրկինը, ՀԿԵ ՓԲԸ-ի գործադիր տնօրեն Սերգեյ Վալկոն, ՀԿԵ ՓԲԸ-ի Նյութատեխնոլոգիական ապահովման տնօրինության պետ Եվգենի Լադոշան, ՀՀ-ում ՌԴ Առևտրային ներկայացուցչության ղեկավար Անդրեյ Բաբկոն, բարերարներ ու հյուրեր:

 

 

 

Եկեղեցիների համաշխարհային խորհրդի հայաստանյան միջեկեղեցական բարեգործական Կլոր սեղան հիմնադրամը «Եկեղեցիների համատեղ գործողություն» դաշինք (ACT Alliance) կազմակերպության արագ արձագանքման ծրագրերի շրջանակում, Մայր Աթոռ Սուրբ Էջմիածնի և դաշինքի հայաստանյան ֆորումի հետ համագործակցությամբ հումանիտար օգնության ծրագիր է իրականացնում Լոռու մարզի Դսեղ և Շիրակի մարզի Հառիճ, Առափի և Ոսկեհասկ համայնքներում: Ծրագիրը հիմնված է կարկտահարությունից տուժած համայնքներին օգնելու վերաբերյալ ՀՀ տարածքային կառավարման և զարգացման նախարարության առաջարկի վրա:

Մարդասիրական օգնության բաշխումը մեկնարկեց Լոռու Դսեղ համայնքում: Մասնագետները հաշվի են առել փաստը, որ կարկուտն ու փոթորիկը ոչ միայն ոչնչացրել են բնակիչների բերքը, այլ նաև ջարդել տների տանիքներն ու պատուհանները: Դսեղ գյուղում 1795 բնակիչ արդեն ստացել է ալյուր և արևածաղկի յուղ պարունակող սննդի օգնության փաթեթները: Օգնության տրամադրման և համակարգման հարցում մեծ աջակցություն է ցուցաբերել Մայր Աթոռ Սուրբ Էջմիածնի սոցիալական ծառայության բաժինը՝ դեմս ղեկավար Տեր Մարկոս քահանա Մանգասարյանի:

Լոռու և Շիրակի մարզերի գյուղապետարանները աջակցում են ծրագրին՝ տրամադրելով շահառուների ցուցակները և մասնակցելով օգնության բաշխման գործընթացին: Հաջորդ շահառու համայնքները Շիրակի մարզից ընտրված բնակավայրերն են:

 

40 սիրիահայ և Շիրակի մարզի կարիքավոր համայքների երիտասարդներ հավաքվել են ամառային ճամբարում՝ մինչև օգոստոսի 8-ը վայելելու իրենց հանգիստը, մասնակցելու հայագիտության և հայ ազգագրական մշակույթի դասընթացներին, սովորելու հայ ազգագրական պարեր: Նրանք նաև բեմադրելու են «Ֆորում Թատրոն»-ի ներկայացումներ՝ իրենց համայքների կարևոր խնդիրների վերաբերյալ:


Մասնակիցները նաև կմեկնեն ուխտագնացությունների՝ Օձուն, Սանահին, Ախթալա, Հաղպատ, ՀԱԵ-ու հոգևորականների ուղեկցությամբ:
Ճամբարի ծրագիրը և բոլոր միջոցառումները ընտրել և պլանավորել են ճամբարի մասնակիցները: Ամառային ճամբարը իրականացնում են ԵՀԽ հայաստանյան Կլոր սեղան հիմնադրամը և «Հալեպ» ՀԿ-ն՝ «Սիրիահայ երիտասարդների պայծառ ապագա» ծրագրի շրջանակում:

 

 

ԵՀԽ հայաստանյան Կլոր սեղան (ՀԿՍ) հիմնադրամի «Տնային տնտեսությունների ինքնազբաղվածության խթանում» ծրագրի շրջանակում Լոռու մարզի սոցիալապես անապահով ընտանիքների 42 երիտասարդ կին և աղջիկ ստացել է անհրաժեշտ մասնագիտական գիտելիք և ձեռք բերել հմտություններ հատապտղային մշակաբույսերի մշակման, վերամշակման և իրացման վերաբերյալ, իսկ տնամերձերում հիմնել են բարձրարժեք մշակաբույսերի հատապտղային տնկարքներ:

Այդ տնկարքները բերքատվություն կունենան վեգետացիոն 1-ին և 2-րդ տարվանից, այնուհետև կապահովեն բնական և վերամշակված գյուղմթերքի իրացման համար անհրաժեշտ հատապտուղների քանակ: Այժմ մասնագետները կանոնավոր տնային այցելություններ են կազմակերպում շահառուների համար դաշտային խորհրդատվություն տրամադրելու նպատակով: Ծրագրի շահառուների արտադրած գյուղատնտեսական բնական և վերամշակված մթերքների զբոսաշրջիկների՝ պահանջներին համապատասխանող իրացումը խթանելու համար, Լոռի Բերդ գյուղում նախատեսվում է ստեղծել «Գյուղատնտեսական արտադրանքի իրացման կենտրոն»: Այն դառնալու է համայնքի բնակիչների գյուղատնտեսական ապրանքները պոտենցիալ գնորդներին առաջարկելու համար մասնագիտացված վայր:

Ծրագրի իրականացման ընթացքում շահառուները ձեռք կբերեն նաև սոցիալական ձեռնարկատիրության, թիմային աշխատանքի և շուկայավարման վերաբերյալ գիտելիքներ ու հմտություններ, կկարողանան ինքնաբացահայտել և ինքնադրսևորվել: Ստացած գիտելիքն ու հմտությունները հետագայում հնարավորություն կտան ընդլայնել գործը և տնտեսությունների եկամուտում մեծացնել գյուղատնտեսությունից ստացվող մասնաբաժինը: Սկսած երկրորդ տարվանից՝ յուրաքանչյուր շահառու «Գյուղատնտեսական արտադրանքի իրացման կենտրոնի» միջոցով վերցրած տնկիների քանակի 50%-ի չափով պետք է տրամադրի այլ շահագրգիռ ընտանիքների:

Լոռի Բերդ գյուղ, որը հայտնի է Լոռե բերդաքաղաք արգելոց-թանգարանով, 2017 թվականին այցելել է մոտ 17000 զբոսաշրջիկ: Խոշորացումից հետո այն դարձել է համայնքային կենտրոն: Լոռի Բերդ գյուղին հարակից Ագարակ և Լեջան գյուղերը նույնպես ընդգրկվել են միևնույն համայնքի մեջ: «Տնային տնտեսությունների ինքնազբաղվածության խթանում» ծրագիրն իրականացվում է Լոռու մարզի Լոռի Բերդ, Ագարակ և Լեջան գյուղերում՝ երեք ամիս ժամկետով: Այն ուղղված է այդ համայնքների անապահով ընտանիքների սոցիալ-տնտեսական մակարդակի բարձրացմանը, երիտասարդ կանանց զբաղվածության ապահովմանը:

Ծրագրի վերջնանպատակն է տնային տնտեսությունների եկամուտում մեծացնել գյուղատնտեսությունից ստացվող մասնաբաժինը՝ բարձրացնելով ինքնազբաղվածության և գյուղատնտեսության վարման արդյունավետությունը: Ծրագրի նպատակներին հասնելու համար շահառուների համար կազմակերպվել են հանդիպումներ, խորհրդատվություններ և դասընթացներ: Փորձագետները նաև այցելել են ծրագրի շահառուների տնամերձ հողատարածքներ՝ հատապտղային տնկարքների տնկման, աճեցման և բերքահավաքի համար հողամասերի ընտրության և հիմնական տնկման սխեմաների ստեղծման համար:

Ձեռք են բերվել ազնվամորու, ելակի, անգույն մոշի, Գոջի բերրիի տնկիներ և բաժանվել շահառուներին:

Ծրագիրն իրականացվում է «Արգինա» մշակութային հասարակական կազմակերպության և «Մաքուր մթերք արտադրողներ» սպառողական կոոպերատիվի համագործակցությամբ: Ծրագրի ընթացքը վերահսկում և մշտադիտարկում է ՀԿՍ-ն:

 

Տեսադարան

Պատկերասրահ

Հետադարձ կապ

[spmap lat="40.1618907" lng="44.2898331" zoom="14" height="100" maptype="ROADMAP"]

Մայր Աթոռ Սուրբ Էջմիածին,
Էջմիածին 1101, Հայաստան

Հեռ.` +374 10 517-157
Հեռ.` +374 10 517-216
Ֆաքս` +374 10 517-436